மண்டேலா மறைவு: தலைவர்கள் இரங்கல்

தென் ஆப்ரிக்காவின் சுதந்திர போராட்ட வீரரும்,கறுப்பின தலைவருமான நெல்சன் மண்டலோ தனது 95-வயதில் காலமானார். கடந்த சில மாதங்களாக உடல் நல குறைவு காரணமாக அவதிப்பட்டு வந்தார். அவரின் மரணம் குறித்து தற்போதைய அதிபர் ஜேக்கப் ஜூமா முறைப்படி அறிவித்தார். உலகத்தலைவர்: தென்னாப்ரிக்காவின் 80 ஆண்டு இனவெறிக் கொள்கையை எதிர்த்து நீண்டதொரு போராட்டம் நடத்தி, அதில் வெற்றி பெற்றது மட்டுமல்லாமல் அந்நாட்டுக்கே அதிபராகி வரலாற்றில் இடம் பிடித்தவர் மண்டேலா. உலகளவில் 250 விருதுகளை பெற்றுள்ளார். அதில் 1993ல் அமைதிக்கான நோபல் பரிசும் ஒன்று. 1918 ஜூலை 18ல் தென்னாப்ரிக்காவின் டிரான்ஸ்கே பகுதியில் பிறந்த மண்டேலாவின் இயற்பெயர் ரோலிஹ்லாஹ்லா. இவரது தந்தை தெம்பு மக்கள் இனத்தலைவராக (அரசராக) இருந்தார். பள்ளியில் மண்டேலாவுக்கு "நெல்சன்' என்ற பெயர் சூட்டப்பட்டது. தந்தை மரணத்திற்குப்பின் மண்டேலா தம் இனத்தின் அரசரானார். "போர்ட்ஹாரே' பல்கலைக்கழகத்தில் படிக்கும் போதே இனவெறியை எதிர்க்க தொடங்கினார். 1944ல் ஆப்பிரிக்க தேசிய காங்கிரஸ் இளைஞர் லீக்கை உருவாக்கினர். 1952ல் சட்டப்படிப்பை ¬முடித்து, "முதல் கருப்பர் வழக்கறிஞர்' அலுவலகம் திறந்தார். வழக்கறிஞராக பணியாற்றும்போது நீதித்துறையில் காணப்பட்ட நிறவெறியைக் கண்டு கோபமுற்றார். ஆயுள் தண்டனை: ஆப்ரிக்க தேசிய காங்கிரசும், கம்யூனிஸ்ட் கட்சியும் ஒருங்கிணைந்து செயல்படத் தொடங்கின. இதனை கண்டு அஞ்சிய வெள்ளையின அரசு 1950ல் கம்யூனிஸ்ட் கட்சியைத் தடைசெய்தது. 1956ல் மண்டேலா உட்பட 156 அரசியல் போராட்டக்காரர்கள் தேசத்துரோக வழக்கில் கைதாகினர். 4 ஆண்டு விசாரணைக்குப் பின் விடுதலை செய்யப்பட்டனர். அப்போதுதான் "ஷார்ப்பிவில்லி படுகொலை'' நிகழ்ந்தது. அமைதியாக ஆர்ப்பாட்டம் செய்த ஆப்ரிக்கர்கள் மீது துப்பாக்கியால் சுட்டதில் 69 பேர் கொல்லப்பட்டனர். இதனால் அதிர்ச்சியடைந்த மண்டேலா "உம்கோண்டோவி சிஸ்வி'' என்ற அமைப்பை நிறுவினார். நாச வேலைகள், கொரில்லாப் போர் போன்ற பயங்கரவாத செயல்களில் அது ஈடுபட்டது. எனினும் அவர் "ஆயுதம் தாங்கிய போராட்டம் தவிர்க்க இயலாது ஆனால் தென்னாப்பிரிக்க பிரச்சினையின் இறுதித் தீர்வுக்கு வன்முறை வழி வகுக்காது'' என்ற கருத்தினைக் கொண்டிருந்தார். அரசு அடக்குமுறைகளைக் கட்டவிழ்த்தது. தென்னாப்பிரிக்க தேசிய காங்கிரஸ் தடை செய்யப்பட்டது. நெருக்கடி நிலை அறிவிக்கப்பட்டது. மண்டேலா தேசத்துரோக வழக்கில் கைதானார். ஆயுள் தண்டனை விதிக்கப்பட்டது. கல்லும் கரையும்: மண்டேலா கேப்டவுன் அருகே ரப்பன் தீவு சிறையில் அடைக்கப்பட்டார். இங்கு வெளி உலகத்தோடு எந்தவித தொடர்பும் கொள்ள ¬முடியாது; செய்தித்தாள்கள் இல்லை. தாய் இறந்தபோதும், மகன் கார் விபத்தில் இறந்தபோதும் இறுதிச் சடங்கில் கலந்து கொள்ள அவர் அனுமதிக்கப்படவில்லை. அரசின் அடக்குமுறைகள், உலகில் கடும் எதிர்ப்பை ஏற்படுத்தியது. ஐ.நா., சபையில் கண்டனம் தெரிவிக்கப்பட்டது. பொருளாதார தடை தீர்மானம் இயற்றப்பட்டது. பல நாடுகள் தூதரக உறவைத் துண்டித்தன. உள்நாட்டில் இருந்த இடைவிடாத எதிர்ப்பும், வெளிநாடுகளின் பொருளாதார தடையும் கடைசியில் இனவெறி அரசின் கண்களைத் திறந்தன. வெற்றியுடன் விடுதலை: 1985ல் தென்னாப்பிரிக்க அரசு மண்டேலாவிடம் பேச்சுவார்த்தைக்கு முன்வந்தது. 1988ல் ""வீட்டுக் காவலுக்கு'' மாற்றப்பட்டார். முதலில் அதிபர் போத்தாவோடும் பின்னர் 1989ல் அதிபரான டிகிளார்க்கோடும் மண்டேலா பேச்சுவார்த்தை நடத்தினார். 1990ல் பேச்சுவார்த்தை பற்றி அதிகாரபூர்வமான அறிவிப்பு வெளியிடப்பட்டது. இதற்கிடையில் ஆப்பிரிக்க தேசிய காங்கிரஸ் மீதான தடை அகற்றப்பட்டது. அரசியல் கைதிகள் விடுதலையாகினர். தொடர்ந்து 1990 பிப்., 11ல், 27 ஆண்டுகால சிறைவாசத்திற்குப் பின், 72வது வயதில் மண்டேலா விடுதலையானார். அதிபராக...: பேச்சுவார்த்தையின் பயனாக 1993ல் ஒர் ஒப்பந்தம் கையெழுத்தானது. அதன்படி வயதுவந்தோர் அனைவருக்கும் வாக்குரிமை என்ற ஜனநாயக நெறிமுறைப்படி தேர்தல் நடத்த அரசு ஒப்புக்கொண்டது. தேர்தலில் வெற்றி பெற்று 1994ல் அதிபராக தேர்ந்தெடுக்கப்பட்டார். மூன்று மனைவிகள்: மண்டேலாவுக்கு மூன்று மனைவிகள். முதல் மனைவி ஈவ்லின், 2வது மனைவி வின்னி, 3வது மனைவி "கிரேகோ மஷேல்'. 3 மகள்களும் ஒரு மகன் உள்ளனர். பெருந்தன்மை: சிறைவாசத்தை விட, வெள்ளை அரசுடன் நடந்த பேச்சுவார்த்தை மனச்சங்கடத்தை அளித்ததாக மண்டேலா கூறினார். எந்த வெள்ளையர்கள் இனவெறி கொள்கை மூலம் மண்ணின் மைந்தர்களை இழிவுபடுத்தினரோ, அதே வெள்ளையர்களுடன் அதிகாரப் பகிர்வு செய்துகொள்ள ¬முன்வந்தது அவரது பெருந்தன்மையைக் காட்டுகிறது. மண்டேலாவின் மறைவிற்கு ஜனாதிபதி பிரணாப் முகர்ஜி, பிரதமர் மன்மோகன் சிங், ஐ.நா., வின் பொது செயலாளர் பான்-கி-மூன் ,அமெரிக்க அதிபர் ஒபாமா, முன்னாள் அதிபர் பில் கிளிண்டன் உள்ளிட்டோர் இரங்கல் தெரிவித்துள்ளனர். மேலும் பல்வேறு நாட்டு தலைவர்களும் மண்டோலாவின் மறைவிற்கு தங்களது இரங்கலை தெரிவித்து வருகின்றனர். தலைவர்கள் இரங்கல் : மறைந்த தென் ஆப்ரிக்க முன்னாள் அதிபர் நெல்சன் மண்டேலாவுக்கு உலகத்தலைவர்கள் பலரும் தங்களின் இரங்கலையும், புகழஞ்சலியும் செலுத்தியுள்ளனர். ஜனாதிபதி பிரணாப் முகர்ஜி : மண்டேலா மனித நேயத்தின் வெளிப்பாடாக திகழ்ந்தார். காந்திக்கு இணையாக வேறு யாரையும் சொல்ல முடியாத நேரத்தில் அந்த இடத்தை மண்டேலா பிடித்தார். அவர் மறக்க முடியாத தலைவர் ஆவார் என ஜனாதிபதி பிரணாப்முகர்ஜி கூறியுள்ளார். பிரிட்டன் பிரதமர் டேவிட் கேமரூன்: ஒரு சிறந்த ஒளியாக திகழ்ந்த மண்டேலா மறைந்து விட்டார். ஒபாமா : அவரின் கொள்கை எதுவும் இல்லாமல் எந்தவொரு அரசியலும் இல்லை. இவரது போதனைகள் எனக்கு ஒரு பாடமாக இருந்தன. அவர் இல்லாத உலகை நினைத்து பார்க்க இயலவில்லை. சுஷ்மா சுவராஜ்: அநியாங்களை எதிர்த்து போராடி வெற்றி கண்ட போற்றுதலுக்குரிய மனிதர் மண்டேலா. அமெரிக்க முன்னாள் அதிபர் பில் கிளிண்டன்: உலக சிறந்த மனித நேய மிக்க மனிதரை இழந்து விட்டோம். ஆஸி பிரதமர் டோனி அப்போட்: மண்டேலா ஒரு சிறந்த மனிதர், ஜனநாயகத்திற்கு அரும்பாடுபட்டவர்.